Күміскөмей Нұр-аға туған жерде ән шырқады

Өнер әлемінде еркін қалықтап, әсем әндерімен қазақтың дархан даласын, жібек самалын, теңіздей шалқыған шабытын, көлдей көңілін, мамыражай мінезін байқатқан күміскөмей әншіміз – Нұрғали Нүсіпжанов биыл сексен жасқа толды. Ол өзі туып-өскен Күреңбел өңіріне келіп, есептік концертін халқына ұсынды.

Елбасының «Болашаққа бағдар: рухани жаңғыру» мақаласының «Туған жерге туыңды тік» бағдарламасы аясында Алматы облысы әкімінің қолдауымен, Сүйінбай атындағы Алматы облыстық филармониясының ұйымдастыруымен туған жеріне сағынышты ән сапарымен келген Нұрғали Нүсіпжановтың «Өз елім» атты ән кеші әуелі Қоғалы ауылының Мәдениет үйінде және аудан орталығы Сарыөзек ауылының Ә.Сарыбаев атындағы Мәдениет үйінде өтті. Сүйінбай атындағы Алматы облыстық филармониясының өнер ұжымы атсалысты. Ол баяғы сыңғырлаған күміс үнімен әуелете ән шырқап, дүйім жұрттың қошеметіне ие болды. Оның әуезді әндері мөлдір бұлақтай сыңғырлап, тыңдармандарының бойын елітті. Қазақстан Республикасының мәдениет қайраткері Ерболат Елкеннің дирижерлігімен М.Төлебаев атындағы халық аспаптар оркестрі Көрпештің «Көңілашар» күйімен концерттің шымылдығын ашты.

Атыңнан айналайын, халық әні,

Атың неткен әдемі еді танымалы.

Өзіңді қанша шырқап жүрсем-дағы,

Тыңдамадым, құмарым қанып әлі,-деп, әнші халық әні «Алқоңыр», «Дедімай-ау» әндерін, сондай-ақ, Н.Тілендиевтің әндері — «Сәлем берем Жетісуға», «Құстар қайтып барады», «Саржайлауым», М.Төлебаевтың «Кестелі орамал», Ш.Қалдаяқовтың «Теріскей», М.Маңғытаевтың «Іздедім сені» және «Сағыныш» әндерін орындап берді. Сонымен қатар, халықаралық байқаулардың лауреаттары — Мұхит Мүкен, Сая Есенгелдинова, Бейбіт Мұсаев сынды әншілер күмбірлеген домбырамен әсем ән мен тебірентер терме айтып, тәтті күйлерді төкті. Күміскөмей әнші аға қай әннің қалай өмірге келгенінен сыр шертіп, олардың тарихына тоқталды. Ол концертінің соңын Н.Тілендиевтің «Өз елім» әнімен аяқтады.

Өнер ұжымына аудан әкімінің «Ықылас» гүлі ұсынылды. Аудан әкімі Бағдат Байшалұлы Алиев:

— Адам өмірге келген соң әдемі қартаюы — зор бақыт. Соның бір айғағы – Алланың нұры жауған, шапағаты тиген біздің ағамыз – Нұрғали Нүсіпжанов.  Кешегі күні көкке самғаған таулардың биігінде жүріп ән салған бала, бүгінде қазақтың мақтанышына айналып отыр. Алтынемелдің етегінде, Үшбұлақтың баурайында, Үштастың биігінде әнін айтқан, Қарабұлақтың суын ішкен, күміс бұлақтың үнін тыңдаған ағамыз бүгін сексеннің сеңгіріне шығып отыр.

Алтынемел асуынан асып, Матай тауына, Көксу тауларына шыққанымда өлең шумақтарын жазған едім. Соны сіздерге оқып берейін:

— Үшбұлақ, Үштасы мен Қарабұлақ,

Су ағады  тас жарып, құздан құлап.

Биікте арқар, теке ойнақтаса,

Шыңында бүркіт ұшқан, ұлар шулап,- дегендей, Нұр-аға қазақтың бүркіті боп самғап ұшса, халқы ұлар болып шулап отыр, мінекей. Сізге деген еліңіздің қошеметін, халқыңыздың құрметін залдағы соғылған шапалақтан аңғарған боларсыз. Халқыңыз сізге шын құрмет көрсетіп, ыстық ықыластарын білдіріп отыр. Әсем де әдемі даусыңызбен ән салып, еліңіздің көзайымы болып, ұзақ ғұмыр кешіңіз. Мынау біздің сізге мінгізген атымыз болсын,-деп, ақшалай сыйлығын ұсынып, қара елтіріден тігілген шапан кигізді.

Бұдан соң ауданымыздың гимні «Күреңбелім» әнін аудандық Ә.Сарыбаев атындағы Мәдениет үйінің өнерпаздары шырқап, әншіге деген шынайы ықыластарын білдірді.

Қазақстан Ленин комсомолы сыйлығының лауреаты, Қазақ КСР Еңбек сіңірген артисі (құрметті атағы), Қазақстанның халық әртісі (құрметті атағы), Өзбекстан Республикасының Еңбек сіңірген мәдениет қайраткері (құрметті атағы), Қырғыздың Абылас Молдабаев атындағы халықаралық сыйлығының лауреаты, Қазақстанның мемлекеттік сыйлығының лауреаты, «Құрмет» ордені, 2011 жылы Президент жарлығымен «Парасат» ордені, 2016 жылы «Қазақстан тәуелсіздігіне 25 жыл» мерекелік медалінің иегері атанған әнші ағамыз өзінің есептік концертін осылайша өрбітті. «Ән – көңілдің ажары» дегендей, әсем ән тыңдап, тәтті күйге бөленген көрермендер Нұр-ағаның өнеріне тәнті болып, ұзақ қол соқты.

Айнаш МӘМІЛЕНҚЫЗЫ.