«Бремен музыканттары» атты музыкалық қойылым қойылды

Таяуда аудандық Ә.Сарыбаев атындағы Мәдениет үйінде Темірбек Жүргенов атындағы Қазақ өнер академиясының ІІІ курс студенттері қайырымдылық шара бойынша «Бремен музыканттары» атты музыкалық қойылым қойды. Араларында біздің ауданның өнерлі де талантты ұлдары —  Д.Қонаев атындағы орта мектебі мен №49 орта мектебінің түлектері — Дулат Жарбасов пен Ердос Рахымжанов та бар.

Спектакль болады дегенді көптен күткен балалар Мәдениет үйіне топырлап келіп жатты. Енді бірде ғимараттың іші бала-шағаға лық толды. Қазақстан Республикасының еңбек сіңірген қайраткері, «Құрмет» орденінің иегері Құдайберген Бекіш сахнаға шығып: «Балалар, Темірбек Жүргенов атындағы Қазақ өнер академиясының ІІІ курс студенттері бүгін алдарыңызда. «Бремен музыканттары» атты музыкалық қойылымнан бұрын концерттік бағдарламаны ұсынамыз. Онда жерлестеріңіз — Ердос Рахымжановтың пантомимасы, «Еңлік-Кебек» спектаклінен үзінді және өзге де бағдарламалар бар» деп, студенттерге кезек берді.

Қойылым барысында балалар көтеріңкі көңіл-күйде болып, қошемет көрсетіп, қолдарын шапалақтап отырды. Көптен бері мұндай қызықты спектакльді көріп-тамашаламаған балалар ондағы ақымақ патша, ханшайым, Бремен қаласының музыканттары – ит, мысық, есек, әтеш және әнші жігіт, күзетшілер, қарақшылар және басқа да кейіпкерлерді сәтті сомдаған өнер академиясының қыз-жігіттеріне тәнті болып, олармен бірге рольдерге енгендей күй кешті. Әсіресе, ақымақ патшаның ролін сомдаған Дулат Жарбасовтың мимикасы, іс-қимылы, дауыс ырғағы балаларды өзіне баурап алды. «Кішкентай актер болғанмен, кішкентай роль болмайды» дегендей, болашақ актерлер өздерінің рольдерін сәтті сомдап, балалардың қошеметіне бөленді.

Аудандық мәдениет және тілдерді дамыту бөлімінің басшысы Әділжан Әділхан: «Күміскөмей әнші Нұрғали Нүсіпжанов, актриса Гүлжамал Қазақбаева,  тамашаның тарланы Тоқсын Құлыбеков, Өкіреш атанған Рахметбай Телеубаев сынды өнер адамдарының киелі Күреңбел жері, Кербұлақ ауданынан шыққанын білесіздер. «Ат тұяғын тай басар» дегендей, міне, Дулат пен Ердос секілді өнерлі жастарымыз осы кісілердің ізін жалғастыратынына кәміл сенімдіміз. «Ұстаны соққан пышағынан таниды» дегендей, шәкірттеріңіздің өнеріне үлкен-кіші бәріміз риза болдық» дей келе,  киелі қара шаңырақтың ұстаздары – аға оқытушы Құдайберген Бекішке, хореограф Гюльназ Гуламдулқызы Бахароваға, сондай-ақ, ҚР мәдениет қайраткері Гүлнар Бекенқызы Аманжанованың жетекшілігімен «Бремен музыканттары» атты қойылымды сәтті орындаған ІІІ курс студенттеріне алғыс айтып, балалардың көңілінен шыққан ұжымға ризашылығын білдірді. Сонымен қатар, Т.Жүргенов атындағы Қазақ өнер академиясының ректоры Бибігүл Нұрғалиқызы Нүсіпжановаға аудан әкімінің Алғыс хатын, көркемдік жетекші Гүлнар Бекенқызы Аманжановаға, сонымен қатар, кішкентайларынан осы сахнада өнер көрсетіп, аудандық, облыстық түрлі байқауларда жүлделі орын алып, ауданның абыройын асқақтатқан Дулат Жарбасов пен Ердос Рахымжановқа аудандық мәдениет және тілдерді дамыту бөлімінің Алғыс хатын тапсырды.

Қызықты музыкалық қойылымды тамашалаған аудан орталығындағы мектептердің оқушылары бір серпіліп қалды. Студенттермен бірге естелікке суретке түсті.

«Өнер – Алланың сыйы» деген, әркімнің өнер адамы бола бермейтіні шындық. Алланың берген қасиеті, таланты болмаса, бос әуреленгеннен түк шықпайтыны да белгілі. Сахнада алтынның сынығындай жарқырап көрінген бүгінгінің жастарын – кешегі күнгі саф алтындай өнер иелерінің ізбасарлары деп білдік. «Өнерлі өрге жүзер» дегендей, ауданымызға келіп, өнер көрсеткен ұл-қыздарымызға ұзақ ғұмыр, бақытты өмір тілеп, өнерде жұлдыздары жарқырай берсін дейміз.

Айнаш ҚАСЕНОВА.