Қарттарым, аман — сау жүрші

Дүниеге келер бір рет

Дәрия кеуде тау — мүсін.

Құрыштан құйған құдірет —

Қарттарым, аман -саумысың?

БҰҰ-ның Бас Ассамблеясы 1990 жылы 14 желтоқсанда 1 қазанды Халықаралық қарттар күні деп жариялады. Тоқсаныншы жылдардың басында Еуропада, бері келе Америкада кең атап өтілетін мереке, жылдар өте әлем бойынша тойлана бастады. Бұл үрдіс елімізде де жалғасын тауып, Қазақстан Респуликасының Президенті Н.Ә.Назарбаевтың 1993 жылғы 13 шілдедегі № 1224 Жарлығына сәйкес қазан айының 1-10 жұлдызы аралығы «Қарттар мен мүгедектер декадасы» деп белгіленіп,   жыл сайын аталып өтуде.

Қарттар – біздің асыл қазынамыз. Осы асыл қарттарымызды құрметтеу, оларға  қамқорлық таныту   жолында ауданымызда да  талай игілікті істер жүзеге асырылуда.        

Еліміздің  өсіп-өркендеуіне,  бейбіт  өмір сүруіне аға ұрпақтың, ардақты да аяулы қарттарымыздың, үлкендердің өлшеусіз  өз үлестерін қосқаны сөзсіз. Саналы ғұмырларын Отан деп, тынымсыз еңбектерімен мемлекетіміздің негізін салуға жол ашқан алдыңғы буын аға-апаларымызға қандай құрмет жасасақ та артықтық етпейді.

Жуырда  өмір жолдары бүгінгі ұрпаққа үлгі ата-апаларды, қазыналы қарттарымызды құрметтеу мақсатында Ә.Сарыбаев атындағы аудандық мәдениет үйінде  қарттар күніне арналған «Қарттарым — асыл қазынам» атты мерекелік іс-шара болып өтті. Аудан әкімі Б.Алиев  құттықтау сөз сөйлеп, ауданымыздың қарттарын мерекелерімен құттықтады.

— Қашанда үлкенге құрмет, кішіге ізет көрсете білетін аудан тұрғындары, біздер, бүгінгі күні ғана емес, барлық уақытта да үлкендерімізді  өнеге тұтып, тәжірибе алатын, жеткен жетістіктерімізді мақтан тұтатын, өмірдің бар қиындықтарын қайыспай жеңе білген аға ұрпақтарымызға бас июге тиіспіз. Біздің қарияларымыз — еліміздің алтын қоры, салт-дәстүрдің шырақшылары, іске адалдықтың, асқан төзімділік пен табандылықтың иесі, болашаққа деген сенімді қалыптастырушы буыны. Әрқашанда қоғам аға буын өкілдеріне зор құрмет көрсетіп, олардың аса құнды кеңестері мен ақыл-парасатын, ғұмырлық ғибратын үлгі тұтатын болғандықтан, бүгінгі күн — жарқын да, ізгі, аса қастерлі шуақты мейрам.

Мемлекетімізде Елбасы Н.Ә.Назарбаевтың сарабдал саясатымен жүргізіліп жатқан реформалар халықтың әл-ауқаты мен әлеуметтік жағдайын көтеруге бағытталып,   қарттарға үлкен мән беріліп, көңіл аударылып, үкімет тарапынан жан-жақты қамқорлық жасалуда. Қарт адамдар мен мүгедектерге арналған арнайы мекемелер, арнаулы әлеуметтік қызмет көрсету бөлімдері жұмыс істеуде,- деп атап өткен аудан әкімі ауданымыздағы 151 жалғызбасты зейнеткердің  арнаулы әлеуметтік қызмет алатынына, Сарыөзек ауылында 1 Ұлы Отан соғысының ардагері әлеуметтік қамқорлықта  екеніндігіне тоқталды.

-Ауданымызда зейнеткерлердің қыстық азық-түлік, отын, көмірлерін алу, түсіру және кіргізу жұмыстары ұйымдастырылуда. Қарттар мен мүгедектерге, қоғамдағы тұрмыс жағдайы аз қорғалған азаматтарға, жалғызілікті қарттарға «Кең болсаң, кем болмайсың» деген халық даналығын ісімен дәлелдеп отырған қолдары ашық, жандары жомарт мекеме басшылары мен ұжымдары көмек қолдарын созуда. Аудандағы бар мекеме мен ұжымдар өздерінде көп жыл еңбек етіп, зейнеткерлікке шыққан жандарға осы онкүндік аясында өз құрметтері мен қошеметтерін көрсетуде. Онкүндік мерекенің бастаушысы өзім болып, қостаушылар аудандық «Атамекен» кәсіпкерлер палатасы, аудандық мұғалімдер кәсіподақ ұйымы, іскер әйелдер қауымдастығы, жеке шаруа қожалықтары, жеке кәсіпкерлер, аудан әкімдігінің бөлімдері, прокуратура қызметкерлері, әскерилер, ұжымдар, мекемелер, аудандық газет тілшісі «Шын жүректен» керуенімен жолға шығып, ауыл округтеріндегі батыр аналарды, ардагерлер мен мүгедектерді, тыл еңбеккерлерін, еңбек ардагерлерін, көп балалы отбасыларды, қарт зейнеткерлерді құттықтап қайттық.

Жеке кәсіпкерлермен келісе отырып, тегін шаштараз және тегін монша күндері, аяқ киімдерін жөндеу және тігін ательелерімен бірлесе киімдерін тегін тігу жұмыстары, орталық аурухана мен ауылдық амбулатория қызметкерлерімен бірлесе отырып, есепте тұрған науқас зейнеткерлердің үйлерін аралап, жағдайларын біліп, дәрігерлердің нұсқауымен тегін дәрі-дәрмек түрлерін тарату жұмыстары жүргізілді.

1-10 қазан айында барлық ауылдық округтерде қайырымдылық түстік ас және «Қамқорлық» акциялары ұйымдастырылды. Бұл бағытта айтулы деңгейде іс-шаралар өткізіп, қайырымдылық акциясына мейлінше көңіл бөлген Қарашоқы ауылының әкімі Дина Ақбасоваға, Басши ауылдық округінің әкімі Тоқтарбек Бекмырзаға, «ИП Ақбасов» Сарыөзек ет комбинатының басшысы Баясыл Ақбасовқа, аудандық білім бөлімінің басшысы Назгүл Балхашеваға, аудандық мұғалімдер кәсіподақ ұйымының төрайымы Ләззәт Момбаеваға, аудандық іскер әйелдер қауымдастығының төрайымы, жеке кәсіпкер Күлсара Әмірееваға, Сарыөзек ауылдық округінің әкімі Батырхан Тұрсынбаевқа, Шанханай ауылдық округінің әкімі Қоныс Толыбаевқа, Жайнақ батыр ауылдық округінің әкімі Асқар Баяділовқа, Қоғалы ауылдық округінің әкімі Самат Исабаевқа және аудандағы барлық мекеме басшылары мен ұжымдарына зор алғысымды білдіремін!

Біздің байлығымыз да, берекеміз де — ардақты қариялар мен ақ жаулықты аналар . Құрметті аға ұрпақ өкілдері, — деген аудан әкімі Б.Алиев қарттарымызға  шынайы алғысын білдіріп, оларға зор денсаулық, ұзақ ғұмыр, көтеріңкі көңіл-күй тіледі.

 Тәрбие — тал бесіктен басталады. Баланы жақсылыққа тәрбиелеп,үйрету, үлгі ету, өнеге көрсету — үлкендердің міндеті.Ата-әжесінің қолында өскен бала мейірімді, ақылды болып өседі деген сөз де бекерден-бекер айтылмаса керек.     Баланың рухани өсуіне де ата мен әженің ықпалы зор. Олар ең алдымен баланың тілін  сындырады,  ана тілін игеруге  ықпал етеді, сыйластыққа, ізеттілікке баулып, үлкендер мен қарт адамдарды құрметтеуге тәрбиелейді. Жаман  сөздерге тыйым салады. Бұның бәрі — тәрбие. Балалары мен немерелеріне бар ықыласы мен мейірімін төгетін сол қарияларымыз бүгінгі мереке кезінде өздерін басқа қырларынан танытып, сахна төріне шығып өз өнерлерін ортаға салды.Қалай мақтасаң да жарасатын бұл қарияларымыздың барлығы дерлік кезінде еліміздің өсіп-өркендеуі үшін аянбай еңбек етіп, тер төккен жандар. Қашанда өздерінің белсенділіктерін көрсетіп келген  олар, бүгінгі мерекеде де қарап қалған жоқ. Өздері сияқты қариялардың көңілін көтермек ниетте сахна төрінде өнерлерін көрсетті.  

Кербұлақ ауданының Құрметті азаматы Мәшкенова Күлән Айманбайқызы Бекен Жамақаевтың «Сен ғана» әнін, аудандық Мәдениет үйі әжелер ансамблінің әншісі Сарқыт Құлманбетова   Марат Омаровтың  «Қазақы дастарханым», Қарымсақ ауылының тұрғыны, зейнеткер Ысқақ Мырзаханұлы Шәмші Қалдаяқовтың «Ақсудан ұшқан аққулар» әнін, жеке кәсіпкер, «Матай» дәмханасының меңгерушісі, Кербұлақ ауданының Құрметті азаматы Зәгүл Бәзілжанова Сәкен Сейфуллиннің «Тау ішінде», Жаңалық ауылы, ақсақалдар алқасының төрағасы, зейнеткер Кемел Айқымбеков өзінің «Тағдырлас» әнін, Қарашоқы ауылдық әжелер ансамблінің мүшесі, зейнеткер Тұрсынхан Мақытбекова Жамбыл Жабаевтың «Угай-ай», Қоянкөз ауылының тұрғыны, зейнеткер  Қожамұрат Әуелбеков    Нұрғиса Тілендиевтің «Алатау», Қоғалы ауылының өнерпазы Людмила Пинчина орыстың халық әні «Синий платочек» әнін, аудандық Мәдениет үйінің әншілері Ләззат Құсайынова мен Сәуле Қожаханова Марат Омаровтың «Анашым», Алматы облысының және Кербұлақ ауданының Құрметті азаматы Төленді Оспанбайұлы Сарыбаев және аудандық Мәдениет үйінің әншісі Мәулеш Әбжаппаров Ескендір Хасанғалиевтің «Атамекен» әнін орындап көрермендер ықыласына бөленсе, Шанханай ауылдық ардагерлер кеңесінің төрағасы, Кербұлақ ауданының Құрметті азаматы, облыстық «Өнерге қарттардың да бар таласы» байқауының жеңімпазы Қозыбек Бақбергенұлы «Матрос» биін орындап, жасына қарамастан  өзінің ширақ қимылымен көрермендерін сүйсіндірді.

Елі, халқы, келешек ұрпағы үшін жасаған игі істерін қарияларымыз  бүгінгі күні  осылайша өнерлерімен  жалғастырды.

Іс-шара барысында қарттарымызға арналған бейнефильм көрсетілді.Бейнефильмді көре отырып,  біздің болашағымыз үшін тер төккен қарттарымызға  өздері бергенді бүгінгі ұрпақ қарттарымыз  берген  деңгейде қайтарып жүрме деген ойдың туындағаны рас. Әй қайдам, олай болса, қарттар үйінде қарияларымыз жас баладай жаутаңдап, мұңайып қалмас еді-ау деген ойдың талайды жетегіне алғаны да  сөзсіз.   

«Өлгеннен соң бәрі де кеш  болады, алтын күмбез орнатсаң да қабіріне» деген ғой.

Бейнефильмдегі әкесін қарттар үйіне өткізген азаматқа баласының: «Мен де тезірек ержетсем екен, сол кезде сені де қарттар үйіне өткізіп, демалдырып қоямын», — деуі «Атаңа не істесең, алдыңа сол келеді» дегенді тағы бір дәлелдеп, көпшілікке ой тастады. 

«Ақиқатты  айқындап жариялар, бара жатыр азайып қариялар» демекші, үлкендерімізді барында бағалап, қадірлейік ағайын, дей отырып, қазыналы қарттарымызды   мерекелерімен құттықтап, мақаламызға  мына өлең жолдарымен  нүкте қойғанды жөн көрдік.

Шапағаты ақ маржан, ақ

                                тарыдай

Жеміс төккен бағбаннның

                          бақтарындай.

Жүре тұршы жарқырап

                              арамызда

Кең пейілді көне көз қариялар!

Ләйлә ЕСКЕНДІРҚЫЗЫ.