Жолдауға — қолдау

«Нұр Отан» партиясы Кербұлақ аудандық филиалының желілік кестесіне сәйкес Елбасы Жолдауының негізгі бағыттарын түсіндіру бойынша «Жоламан» БПҰ төрағасы Дәулет Нүспеков Арқарлы асуында орналасқан «Шадиев» шаруа қожалығының еңбек ұжымымен кездесті.

Дәулет Мұратбекұлы, Елбасы Н.Назарбаевтың 2017 жылғы 31 қаңтардағы «Қазақстанның үшінші жаңғыруы: жаһандық бәсекеге қабілеттілік» атты Қазақстан халқына Жолдауын түсіндіру жұмыстарын жүргізді.

Дәулет Мұратбекұлы: — Мемлекет басшысы Нұрсұлтан Назарбаевтың «Қазақстанның Үшінші жаңғыруы: жаһандық бәсекеге қабілеттілік» атты Жолдауы өте маңызды стратегиялық сипатқа ие. Сондықтан да Қазақстанның жаңғырудың жаңа кезеңіне көшуі Жолдаудың негізгі мақсаты болып отыр. Жолдауда Елбасы бес негізгі басымдылықты айқындады. Атап айтсақ, бұл-экономиканың жеделдетілген технологиялық жаңғыртылуы, бизнес-ортаны түбегейлі жақсарту және кеңейту, макроэкономикалық тұрақтылық, адами капитал сапасын жақсарту және институттық өзгерістер, қауіпсіздікке және сыбайлас жемқорлықпен күрес.

Осы басымдықтарға сәйкес, Жолдауда ішкі әлеуметі әлі сарқылмаған және бәсекелік артықшылықтарға жетуге үлкен мүмкіндіктері бар. Жаңа «өсу нүктелеріне» және «қозғаушы күштерге» ерекше көңіл бөлінді. Оған қоса, Елбасы әлемдік экономикада болып жатқан жаһандық технологиялық өзгерістерді есепке алу керектігіне, еліміздің әл-ауқатын одан әрі көтеру үшін барлық өндіріс және қызмет көрсету салаларында тиімді инновациялық механизмдерді қолдану қажеттілігіне баса назар аударатындығын айтып жеткізді, — дей келе, Елбасының әр Жолдауы – еліміз үшін де, жеріміз үшін де маңызды екендігін, себебі, нақты міндеттер белгіленіп, мақсаттар айқындалып, толайым табысқа қол жеткізу үшін де ауызбірлік пен тыныштық керектігін жеткізді. Бұл тұрғыдан еліміз әлемге бейбітсүйгіш қалпымен де үлгі көрсетіп келетінін айтты.

Назым АЛШЫНОВА,

Жоламан ауылдық округі әкімі

аппаратының жетекші маманы,

партия белсендісі.