Кәсіпкерлер құқы қорғалады

Елбасымыздың Ұлт жоспарының 100 қадамының 54-ші қадамында «Кәсіпкерлердің мүдделерін қорғау үшін бизнес-омбудсмен институтын нығайту қажет. Жаңа институттың құрамына бизнестің және Ұлттық кәсіпкерлер палатасының өкілдері кіреді» деп атап көрсетілген. Осы орайда жақында Алматы облысы кәсіпкерлер палатасының Кербұлақ аудандық кәсіпкерлер палатасы филиалы мен аудан прокуратурасының ұйымдастыруымен «Біз бизнесті қорғаймыз» атты дөңгелек үстел болып өтті.

Дөңгелек үстелге аудан прокурорының орынбасары Ізтаев Асқар Исағалиұлы, Алматы облысы кәсіпкерлер палатасының филиал директоры Тастанбеков Болат Батырханұлы, кәсіпкерлер, шаруа қожалықтарының басшылары, аудандық бөлім басшылары, салық органының қызметкерлері қатысты.

Дөңгелек үстелді Алматы облысы кәсіпкерлер палатасының филиал директоры Болат Батырбекұлы Тастанбеков ашып, ұлттық палата қамқорлығымен тұрақты түрде әрекет ететін жұмыс органы – Кәсіпкерлер құқығын қорғау жөніндегі кеңес құрылғанын, өңірлік палаталарда да сәйкесінше осындай Кеңестер жұмыс жасайтынын тілге тиек етіп, жиналғандарды дөңгелек үстелдің мақсатымен таныстырды.

Бұдан соң аудан прокурорының орынбасары Асқар Исағалиұлы сөз алды.

— 6 қазан күні Бас прокуратурада «Бизнесті қорғау жөніндегі картасының жүзеге асырылу барысы» тақырыбында өткен алқа отырысының жедел нәтижесі ретінде, бизнесті заңсыз тексерістерден қорғауға, кәсіпкерлер тірлігіне жөнсіз килігуге тыйым салуға, түйіткілді мәселелерді бірлесе отырып шешуге, ауданда қалыптасқан бизнес – ахуалды жақсарту мақсатында бас қосып отырмыз. Бас прокуратура мен «Атамекен» Ұлттық кәсіпкерлер палатасы бірқатар ұйымдастырушылық қадамдар жасады. Заңға түзету енгізусіз, қазірдің өзінде қылмыстық-құқықтық салада бизнеске қысымның азаюына қол жеткізді. Бас прокурордың бұйрығымен ақпараттарды есепке алу кітабына тіркеу, сотқа дейінгі тергеудің бірыңғай тізілімін жүргізу қағидалары өзгертілді. Кәсіпті өркендетуге кедергі келтіретін жәйттар көрсетілетін формуляр Бас прокурутураның сайтына орналастырылып, сілтемелер «Атамекен» Ұлттық кәсіпкерлер палатасы мен «Нұр Отан» партиясының барлық өңірлік сайтарында қолжетімді. Кеңес қызметі БАҚ және блогерлер арасында кеңінен насихатталды. Сондықтан Кеңесте қаралатын кез-келген кәсіпкердің мәселесі шешілетініне күмән келтірмеңіздер, — деп аяқтады сөзін аудан прокурорының орынбасары.

Дөңгелек үстел барысында жиналғандар көңілдерінде жүрген сұрақтарын қойып, әрқайсысы тұщымды жауаптарын алып, осындай маңызды кездесу үшін ұйымдастырушыларға алғыстарын білдірді.

Дина АМАНҚЫЗЫ.