Алқабилер кандидаттарымен жүздесті

Таяуда аудан әкімдігінің мәжіліс залында  аудан әкімі Бағдат Байшалұлы Алиевтің  алқабилер кандидаттарымен кездесуі өтті.

Аудан әкімі Б.Алиев:

— Алқабилер туралы  Қазақстан Республикасының 2006 жылғы 16 қаңтардағы № 121 Заңының талаптарын орындау мақсатында алқабилер кандидаттарымен жүздесуді жөн санап отырмыз. Жаңа мемлекет болып құрылғаннан бері бұл заң 2007 жылдың 1 қаңтарынан бастап қолданысқа енгізілді. Алқабилер Кеңес заманында да болған. Ол кезде «народный заседатель» — «халық биі» аталса, бүгінде «алқабилер» деп аталады. Қарапайым тілде айтсақ, алқабилер — халықтың сенімді өкілдері. Өмірде шалыс басқанды, тура жолдан адасқанды қорғап қалу үшін халықтың атынан заңның аясында атсалысу.  Аудан бойынша елу мың адам болса, соның ішінен өздеріңізді таңдап алдық. Бұл Заң қылмыстық сот iсiн жүргiзуге алқабилердiң қатысуына байланысты қоғамдық қатынастарды реттейдi, алқабилердiң құқықтық мәртебесiн, тәуелсiздiгінің кепiлдiктерiн, олардың қызметiн қамтамасыз етудiң құқықтық, экономикалық  және ұйымдастырушылық негiздерiн айқындайды,-дей келе, алқабиге кандидаттар бойынша  қойылатын талаптармен таныстырды:

1) Алқабилердiң тiзiмдерiн жасау кезiнде жиырма бес жасқа толмаған; 2) өтелмеген не алынбаған сотталғандығы бар; 3) сот әрекетке қабiлетсiз немесе әрекет қабiлетi шектеулi  деп таныған адамдар; 4) судьялар, прокурорлар, тергеушiлер, адвокаттар, мемлекеттiк қызметшiлер мен әскери қызметшiлер, сондай-ақ, құқық қорғау органдарының қызметкерлерi; 5) наркологиялық немесе психоневрологиялық диспансерде есепте тұрған адамдар енгізілмейді; 6) қылмыстық iс бойынша сот iсi жүргізілетін тiлдi бiлмейтiн адамдар; 7) өздерінің дене кемiстігі немесе психикалық кемiстiгi салдарынан алқабидiң мiндеттерiн атқаруға қабiлетсiз адамдар; 8) алпыс бес жастан асқан адамдар; 9) дiни қызметшiлер өздерiнiң жазбаша өтiніші бойынша алып тасталады. Сондай-ақ, алқабиге кандидаттардың тізімдеріне азаматтарды енгiзуге шығу тегiне, әлеуметтiк, лауазымдық және мүліктік жағдайына, жынысына, нәсiлiне, ұлтына, тiлiне, дiнге көзқарасына, нанымына тұрғылықты жерiне байланысты немесе кез келген өзге мән-жайлар бойынша қандай да бiр шек қоюға жол берiлмейдi,-деп алқабилер жайында кеңінен мағлұмат берді.

Бұдан соң аудан әкімінің орынбасары Болысбай Тоғысбайұлы Момбаев алқабилердің құқықтары мен міндеттерін және істі қарауға байланысты іс-әрекеттеріндегі шектеулерді түсіндіріп, мысалдар келтірді.

Аудан әкімі Бағдат Байшалұлы он тоғыз баптан тұратын Алқабилер туралы  Заңды кандидаттарға таратып беруді аппараттың құқық мәселелері жөніндегі бас маманы Ермек Асановқа жүктеді.

Сөз кезегін алған Ермек Асанов:

— Біз облыстық прокуратураға тізімді жібереміз. Ол жақтан көлік жүргізу жөнінде айыппұлдары мен заң бұзушылықтардың бар-жоғы анықталған соң қайтадан тізімге енгіземіз. Екі жүз адамның тізімі жасалуда. Әр ауыл округінен он үш адамнан айналып отыр. Егер медициналық тексеруден өтетіндей болып жатса, онда ауыл округтерінің әкімдерінің көмегімен аудан орталығындағы ауруханаға келіп, тексерілесіздер. Аудандық мамандандырылған соттарға шақыра бермейді, оған медиаторлар қатысып, бітімгерлікке келіп, татуластырылады. Сіздер Қылмыстық кодекске қатысты істердің қаралуына шақырылуларыңыз мүмкін. Сот шақырған кезде іссапарлық қағаздарыңыз бен жеке куәліктеріңізді міндетті түрде апаруларыңыз қажет, сондай-ақ, шақырған уақыттан қалмай, дер кезінде баруларыңыз керек. Өздеріңізге алқабилер туралы Заңды әр ауыл округтерінің электронды пошталарына саламыз. Соны мұқият оқып, танысуларыңызды өтінемін,-деп мағлұмат берді.

Сонымен қатар, «НұрОтан» партиясы аудандық филиалы төрағасының орынбасары Жомарт Сақанұлы Бозымбеков алқабилердің еңбектері, олардың міндеттері жайында сөз қозғап, шетел фильмдерінен мысалдар келтірді. Жиын қорытындыланып, кандидаттарға ризашылық білдірілді.

Айнаш ҚАСЕНОВА.