Айбары асқақ Ата Заң

Кез келген мемлекеттің тәуелсіздігін, демократиялық құндылықтарын айқындайтын негізгі құжат – Конституция екені бәрімізге белгілі. Осыдан 22 жыл бұрын 30 тамызда Қазақстан халқы тарихи шешім қабылдап, еліміздің құқықтық өміріндегі жасампаз жаңа дәуіріне қадам басқан еді. Содан бергі мемлекет пен қоғам заңдылықтарының орнығу талпыныстары – Ата Заң қағидалары негізінде жүзеге асырылып келеді.

Осы орайда жақында Ә.Сарыбаев атындағы Мәдениет үйінде Конституция күніне арналған «Айбары асқақ Ата Заң» атты жиын болып өтті. Жиынға аудан әкімі Бағдат Байшалұлы Алиев, аудандық мәслихаттың хатшысы Рысбеков Бөкен Қабиұлы, аудан әкімінің орынбасарлары, аудандық құқық қорғау органдарының қызметкерлері, аудандағы мекеме басшылары мен қызметкерлері, Сарыөзек гарнизонының әскерилері, ауыл округтерінің әкімдері және БАҚ өкілдері қатысты.

Мерекелік шараға сай әсем безендірілген  зал лық толып, жүргізушілер, аудандық Мәдениет үйінің қызметкерлері  Мәулеш Әбжаппаров пен Айдана Мұсағұлова:

—        Әр бабы, әр тармағы

                                       жойылмайды,

Шектеу де заңымызға қойылмайды.

Келісім-шарт жасасқан барлық шетел

Қазақтың Ата Заңын мойындайды, — деген өлең жолдарымен жиынды ашық деп жариялады.  ҚР Гимні орындалып, алғашқы сөз кезегін , баяндама жасау үшін, аудан әкімнің орынбасары Момбаев Болысбай Тоғысбайұлы алды.

—        Құрметті, жиынға қатысушылар! 1995 жылы  30 тамызда бүкіл халықтық референдумда қабылданған Ата Заң егеменді еліміздің мемлекеттік құрамын белгілейтін ең жоғарғы нысанымыз болғанын жақсы білеміз.

 Конституция енген уақыттан бастап қоғамымызда жаңа қатынастардың қалыптасуы мақсатында даму реформалары үздіксіз жүргізілді. Еліміз өзін демократиялық негіздегі зайырлы, құқықтық және әлеуметтік жағынан дамыған ел  ретінде әлемге танытты.

Ең жас Конституциялардың бірі болғанына қарамстан, біздің Ата Заң уақытың сынынан сүрінбей өтіп, заманға лайықты екенін сан рет дәлелдеді. Ал зерттеулер нәтижесі бойынша Қазақстан Конституциясы әлемдегі жалпыадамзаттық құндылықтарды дәріптейтін ең үздік 50 конституцияның құрамына кіреді. Бұл керемет емес пе?!

Осы мемлекеттік ережелерді берік ұстана өмір сүру – демократияның ең жоғарғы мектебі. Бұл мектептен барлығымыз өтуге тиіспіз. Елімізді, егемендігімізді қалай биікке көтерсек,  Ата Заңды да солай аялауға міндеттіміз. Отанның берекелі болашағы  үшін Конституцияны құрметтуге шақырамын, — деп, сөзін аяқтады Болысбай Тоғысбайұлы.

    Келесі кезекте мінберге көтерілген аудан әкімі Бағдат Алиев жиналғандарды айтулы мерекемен құттықтап, аудан экономикасының дамуына үлкен үлес қосып жүрген қызметкерлерді аудан әкімінің Алғыс хатымен марапаттады. Үлкен марапатқа ие болған сот істерінде 30 жылдан астам уақыт үздіксіз қызмет атқарып жүрген Кербұлақ аудандық сотының бас маманы Есбергенова Жанар Айымқызы, 2010 жылы Алматы облысы прокуратурасынан еңбек жолын бастап, 2014 жылдан Кербұлақ ауданы прокуратурасының прокуроры   Абдраман  Олжас Әмірғалиұлы, адвакатура саласында 20 жылға жуық абыройлы қызмет атқарып жүрген Диханбаева Қарлығаш Сейітжанқызы, 10 жылдан астам тыңғылықты  еңбек етіп, басқарма  құжаттарының мемлекеттік  тілде жүргізілуіне үлес қосып жүрген аудандық Әділет  басқармасының инспекторы Диханбаева Мадина Тұрдақынқызы, көп жылдан бері әртүрлі орта және аға басшы құрам лауазымдарында қызмет атқарып жүрген, АІІБ-нің жергілікті полиция қызметінің инспекторы, полиция капитаны Жексембаев Мұхит Ысқақбайұлы, Кербұлақ, Қоғалы аумақтық сот актілерін орындау бөлімдерінде 30 жылдан аса еңбек етіп жүрген, аумақтық сот актілерін орындау бөлімінің инспекторы Анықбаева Гүлзада Абдығапарқызы, 15 жылға жуық Сарыөзек Әскери гарнизонының полиция бөлімінде мінсіз қызмет атқарып жүрген әскери полиция бөлімінің бөлімше бастығы, патруль старшинасы Ахметов Жұмағазы Зейнолдаұлы, әскери прокуратура органдарында 20 жылға жуық қызмет атқарып жүрген Сарыөзек әскери прокуратурасының аға прокуроры, әділет майоры Иманқұлов Айдын Жұмағалиұлының мерейлері үстем болды.

Өз кезегінде сөз алған Кербұлақ ауданы прокурорының орынбасары Ізтаев Асқар Исағалиұлы, Сарыөзек әскери гарнизонының Әділет подполковнигі Сыламбеков Айдар Қуанышбекұлы қол жеткізген игіліктеріміз – адам құқықтары мен бостандықтарын барынша бағалау мақсатында, құқықты ізгілендіру ниетімен Конституцияға енгізілген толықтырулар мен өзгерістерге тоқталып, жиналғандарды құттықтап, ізгі тілектерін жеткізді.

Салтанатты жиын соңы Ә.Сарыбаев атындағы Мәдениет үйі әншілерінің концертіне ұласты. Жиынның әсерлі өтуіне ерекше үлес қосқан аудандық Мәдениет және тілдерді дамыту бөлімінің басшысы Әділжан Әділханға , көркемдік жетекші Жексенбаев Жанғазы Жұманұлына, әсем де әсерлі әндерімен жиналғандарға мерекелік көңіл-күй  сыйлаған күміс көмей әншілер  «Үздік мәдениет қызметкері» Ләззат Құсайыноваға, Зейнеп Қойшыбаева атындағы байқаудың лауреаты, «Бейбітшілік әлемі» атты халықаралық байқаудың Бас жүлдегері Сәуле Қожахановаға, «Бейбітшілік Әлемі» атты халықаралық байқаудың І орын иегері Айдана Мұсағұловаға, «Жұлдызым» жобасының Бас жүлдегері Мәулеш Әбжаппаровқа, Анар Жұмабаева, Ақнұр Бекқасымоваға, жерлесіміз Гүлзада Сыдықованың сөзіне жазылған, сазгер марқұм Бауыржан Шакаровтың әніне жазылған «Туған жерім – Күреңбел» әнін жаңаша өңдеп, халыққа ұсынған «Нұр» дыбыс студиосының жетекшісі Тілеужан Есерханұлына көпшілік атынан алғыс білдіреміз.

Дина АМАНҚЫЗЫ.