Білім жүйесіндегі өзгеріс

Қазіргі білім жүйесіндегі өзгерістер жаңаша сипатқа ие болып отыр. Соңғы уақытта оқытудың тиімді жолдары қарастырылып, ұстаздар жаңа модельдегі оқыту жүйесіне көшуде. Әлемдік деңгейде роболан және робототехника бойынша нанотехнологияны дамыту қолға алынуда. Сол себепті, оқытуда АКТ-ны пайдалану оқытудың бір ажырамас бөлшегі болмақ.
Білікті мұғалім теориялық және тәжірибелік білімін өзара тығыз байланыстыра алуы керек. Себебі, АКТ-ны енгізген кезде теориялық және тәжірибелік білімдері оларды ойланып қолдануды қамтамасыз етеді, ал бұл оқыту оқу үрдісін жақсартуға жағдай жасайды. Қазіргі қоғамдағы балалар мобильді балалар, ал мұғалім олардың ұсынысына жауап беру үшін кез келген техникалық заманауи құрылғыларды жетік білуі керек. Сонымен қатар, осы тұрғыда мұғалімнің педагогикалық білімі де маңызды фактор болмақ. Педагогикалық білік дегеніміз — мұғалімнің білім берудегі оқыту мақсаты мен міндеттерін білуге негізделетін оқыту мен оқу үрдістері, тәжірибесі мен әдістері туралы білімі. Бұл жерде мұғалімнің сабақты құрудағы шеберлігі мен оқытуда қолданатын стратегиялары, оқушылардың білімді меңгеруі мен дағдыларын қалыптастырудағы әдіс-тәсілдері маңызды деп есептеуге болады.
Сондай-ақ, технологиялық, педагогикалық және пәндік білім туралы Мишра мен Клердың зерттеулерінің нәтижесіне сүйенсек, осы үш білім саласын өзара байланыстыра алған мұғалім жоғарғы деңгейдегі кәсіпқой мұғалім болмақ. Яғни, жекелеген пәндерді оқытуға білім технологияларын ықпалдастыру мұғалімнің қарқынды дамуына, оқудың барлық үш аспектісін өзара байланыстырып белсенді қолдануына дайын болуын қажет ететіндігі және бұл оқыту мен оқу үрдістерін білікті түсіну көрсеткіші болып табылатындығын білген жөн.
Ендігі сұрақ мен практикада осы АКТ-ны қалай қолданамын деген бағытта қойылатыны анық. Теориялық білімді практикамен ұштастыра білу асқан шеберлікті талап етеді. Ендеше осы тұрғыда аз да болса осыған назар аударсақ, оқушыға қағаз бен қаламмен оқытқаннан гөрі замануаи инновациялық техникалық құралдар арқылы жұмыс жасаған тиімді. Алғашқысы, оқушының оқуға деген қызығушылығы артады, яғни мобильді балалардың сұранысына жауап береміз, ал екіншісі осы арқылы оқушы жаңа техникалық құрылғылармен жұмыс жасауды үйренеді.
Демек, оқытуда АКТ-ны пайдаланудың маңызы зор. Ал, оны білу – әрбір ұстазға міндет. Мінсіз, сыни ойлап, қоғамға өзіндік пайда әкелетін оқушы тәрбиелейтін ұстаз да осы сұраныстарға жауап беретін, сыни ойлайтын, құндылықтарды бойына сіңірген болуы қажет.

Г.БОСТАНБАЙ,
Қаспан орта мектебі
мектепке дейінгі шағын орталығының инфарматика пәнінің мұғалімі.