Егістіктегі мол өнім

Бүгінде Жоламан ауыл округінде барлығы елу алты шаруа қожалығы егін шаруашылығымен айналысуда. Оның ішінде  Бағдыбай Кенжағалиевтің «Сым-Саб», Құдайберген Талғарбаевтың «Талғарбаев Қ», Арман Нұрсұлтановтың «Нұр», Асхат Кереевтің «Бекзат», Нұрлан Қожахметовтың «Әбен» шаруа қожалықтарын атауға болады. Осы орайда, «Әбен» шаруа қожалығының басшысы Нұрлан Қожахметовтың егістік алқабына атбасын тіреп, биылғы түсім жайында әңгімелескен едік.

 — 2007 жылдан бастап осы «Әбен» шаруа қожалығын құрып, еңбек етіп келеміз. Биылғы ауа райы ауылымыздың  диқандары үшін күрделі болғаны рас. Табиғат бұрын-соңды болмаған тосын  мінезін танытуда.  Биыл көктем жай  шықты, сол себепті шаруаға кедергісін тудырғаны шындық. Жаз айлары да қолайсыздау болды деуге негіз бар. Алайда, шілде айы басталысымен диқандар қызу жұмысқа кірісті. Біздің иелігімізде 100 гектар егістік жер, 250 гектар жайылым бар. Жалпы 75 гектар жерге күздік бидай, 25 гектар жерге жаздық арпа егілді. Биыл күздік бидайдан бір гектарына 16-18 центнерден, ал жаздық арпадан гектарына 12-14 центнерден өнім алып отырмыз. Бұл көрсеткіш былтырғы жылмен салыстырғанда төмендеу. Науқан жұмысына бес адам және қажетті техникалар жұмылдырылды,-деді маңдай терін сүрткен диқан.

«Диқан жерін анасындай сүйеді, жер диқанға баласындай иеді» дегендей, Жер-Ананы емген диқан қауымына қамбаларыңыз астыққа толсын дейміз.

Дидар ДИХАНБАЕВ.