Заңгер әулет

Кішкене ғана сөз басында қазақтың мағынасы терең талай сөзін арқау етіп тастадық. Сонысымен қазақ дана, қазақ дара. Сол ұлттың ұрпағы болған соң өзімшілдікке салынды дей көрмеңіз, әлемге құлақ түрген, өркениеттердің өсиеттерін естіген азамат ретіндегі мойындауымыз. Сол дана қазақ «Балапан ұяда не көрсе, ұшқанда соны іледі» депті. Расы сол, қазіргі біз өмір сүретін қоғамда ұстаздар отбасында мұғалім болуды, дәрігерлер отбасында ақ халат киюді, тәртіп сақшылардың шаңырағында заң үстемдігін қалыптастыруды мақсат еткен балалар көп болады. Оның бір айқын дәйегі – Күреңбел топырағында ғасырға жуық «Заң мен тәртіп» қағидатының үстемдігін қалыптастырған Машанло әулеті.

Ширек ғасырдан астам уақыт Кербұлақ ауданының ішкі істер бөлімінде еңбек еткен Валихан Машанло қазір құрметті еңбек демалысында. Әулеттік миссияны өз ғұмырында адал атқарған азамат осы күні баласының кеңесшісі, ақылшысы. Өйткені үлкен ұлы қазір заң үстемдігін қалыптастырушы, ал бір бұрымдысы құқық қорғаушы болуға бағыт алған. Нақтысын айтқанда, ҚР Ішкі істер министрлігінің Махан Есболатов атындағы Алматы академиясының 2-курс студенті.

Бақсақ, бұл әулет әу бастан құқық қорғау саласында еңбектеніп келеді. Валиханның әкесі Хусаин Машанло да, анасы Гүлсара Бейсенова да осы салада тер төккен.

– Анамыз бұрынғы Гавриловка ауданында паспорт кеңсесінде еңбек жолын бастап, аудандық ішкі істер бөлімінде еңбек етті. Әкеміз де, үлкен бауырымыз да осы салада тер төкті. «Алдыңғы арба қайда жүрсе, соңғы арба сонда жүреді» деген бар. Біз де осы салада еңбектендік. Өзім де еңбек жолымды Алтынемел ауылында учаскелік полиция инспекторы болып бастап, жоғары лауазымдарда қызмет еттім. Қазір зейнеткерлікке шыққаныммен балаларымның бағдаршамымын. Үлкен ұлым аудандық жол патрульдік полиция инспекторы. Бар білгенімді үйретіп отырамын, – дейді ол.

2023 жылдан аудандық полиция бөлімінде қызмет етіп жүрген Вильжан Хусаин династиялық кәсіптің жүгін көтеріп жүргеніне дән риза. 2000 жылы дүниеге келген тәртіп сақшысы салаға өз жүрек қалауымен келіпті. Шымкент қаласындағы академик А. Қуатбаев атындағы Халықтар достығы университетін тамамдаған соң құқық қорғаушы болуға бекініпті.

– Әкеміз осы салада еңбектенуімізге қарсы болған жоқ. Ақылшымыз әу бастан қандай таңдау жасасақ та қарсылық танытпайды. Бастысы, елге пайда тигізер дұрыс таңдау болса болғаны. Қазір жол қауіпсіздігін қамтамасыз етіп жүрміз. Шын мәнінде, бүгінде құқық қорғаушы болу – «Бетегеден биік, жусаннан аласа» болу деген сөз. Халық сауатты. Кейде шектен тыс сауатты. Дауласуға даяр. Көз жұмып, даурығуға бейім. Осындайда тәртіп сақшысы «менікі дұрыс» және «мен мықтымын» демеуі тиіс. Тәртіп сақшысы психолог болуы керек. «Заң мен тәртіптің» маңыздылығын тұрғындарға жете түсіндіру керек. Тұрғындар тарапынан заңға құрмет те күшейген. Бұл мемлекеттік тұрғыда заң үстемдігін қалыптастыру реформаларының айқын көрінісі, – дейді тәртіп сақшысы.

Құқық қорғау саласының ыстығы мен суығына қатар төзген Валихан Машанло балаларының осы саланы таңдауына разы. Айтуынша, «боламын» деген баланың бетін қақпаған абзал. Тек дұрыс бағдар беру керек.

– Балаларым ата-әжесінің, менің жолымды жалғаймын дегенде біршама абдырадық. Қалай дегенмен сан қиындық өтті бастан. Біз қиын кезеңдерде халықтың қауіпсіздігін қалыптастырдық. Қазір құқық қорғау саласына келген жастарға көп мүмкіндік бар. Баспанамен қамту, қажетті жабдықтармен қамтамасыз ету мәселелері толық шешілген. Тек оларға жұмыс істеу керек. Бастысы, заң үстемдігін қалыптастырып, қоғамда әділдік пен әділеттілік орнатуы тиіс. Басқа балаларым полицей боламын десе қарсылық танытпай, бағдар беріп отырамын, – дейді Валихан Машанло.

Осылайша бұл әулетте үшінші ұрпақ құқық қорғауға бағыт алып жатыр. Династиялық кәсіпті тұрмысқа арқау еткен тәртіп сақшыларына біз де тілеулестік таныттық.