Алматы облысының үздік спортшыларына «Хан Тәңірі» сыйлығы берілді

Осы саланың көшбасшылары ғана емес, олардың жаттықтырушылары, сондай-ақ облыс пен елдің жетекші ақпараттық көздерінде олардың жеңісін үнемі жариялап отыратын БАҚ өкілдері де даусыз еңбегі мен спортты дамытуға қосқан үлесі үшін әкім сыйлығына ие болды.
Іс-шараға Алматы облысы әкімінің орынбасары Арслан Дандыбаев, дене шынықтыру және спорт басқармасының басшысы Нұрбақыт Теңізбаев, Олимпиада чемпиондары, облыстың спорт мекемелерінің басшылары, ардагерлер мен еңбек сіңірген спорт қайраткерлері қатысты.
Соңғыларына «дене шынықтыру мен спортты дамытуға сіңірген еңбегі үшін» төсбелгілері және ҚР Мәдениет және спорт министрлігінің Құрмет грамоталары табыс етілді.
Ал «Хан Тәңірі» спортшылары сыйлығының иегерлері: Токиода өткен ХХХІІ жазғы Олимпиада ойындарының қола жүлдегерлері Игорь Сон, Зульфия Чиншанло, Токиода өткен ХХХІІ жазғы Паралимпиада ойындарының қатысушылары Раушан Қойшыбаева, Рахметжан Хамаев, Гүлбану Әбдіхалықова, Әлем және Азия чемпионаттарында жоғары нәтижелерге қол жеткізген спортшылар Жамила Бақбергенова, Абылай Әуелханов, Ернар Шымбаев, ардагерлер арасындағы триатлоннан «Темір Адам» халықаралық турнирінің жеңімпазы және ҚР чемпионы Бақытжан Бектенов, сондай-ақ, «Айқаракөз» волейбол командасы әйелдер арасында волейболдан Орта Азия чемпионы атағы үшін «Хан Тәңірге» ие болды.
Парапауэрлифтингтен ҚР еңбек сіңірген жаттықтырушысы Денис Орлов пен әйелдер күресінен ҚР еңбек сіңірген жаттықтырушысы Қайрат Сағадиев те назардан тыс қалған жоқ.
Барлығына естелік сыйлықтар мен ақшалай сертификаттар табыс етілді.