Қанат қақты түлектер ұясынан Құрметті мектеп түлектері!
Қанат қақты түлектер ұясынан
Құрметті мектеп түлектері!
Сіздерді осы газет арқылы соңғы қоңырау мерекесімен шын жүректен құттықтаймын!
Осыдан 11 жыл бұрын тарыдай болып мектеп табалдырығын аттаған балалар бүгін таудай болып үлкен өмірге қадам басқалы отырсыздар.
Әр мектепте соңғы қоңырау мерекесі – бұл мектеп тарихына енетін көңілді әрі қуанышты оқиға.
Түлектер өздерінің он бір жыл білім алған алтын ұяларымен қоштасса, ұстаздар өздерінің сүйікті шәкірттерін өмірге қанаттандырады.
Барша жас түлектерді алда үлкен сын күтіп тұр. Барлықтарыңызға Ұлттық Бірыңғай тестілеуден абыроймен өтіп, Қазақстанымыздың білікті маманы атануларыңызға тілектеспін. Ал мектептегі алғашқы жылдарын сәтті аяқтап, бірінші сыныптан екіншіге аяқ басқан жас бүлдіршіндер мен барлық мектеп оқушыларына жазғы демалыстарын жақсы өткізіп, күш жинап, жайдары көңіл күймен жаңа оқу жылына оралуларыңызға тілектеспін.
Ермек ДОСАЛБАЕВ,
білім бөлімінің басшысы.
Соңғы қоңырау мерекесі «Birgemiz: ТҮЛЕК-2020» концепциясы негізінде өткізіледі
Аудандық білім бөлімі, «Birgemiz: ТҮЛЕК-2020» концепциясын барлық білім беру мекемелеріне жұмыс жүргізу үшін таныстырады. Концепция ҚР Білім және ғылым министрлігі тарапынан 2020 жылы мамыр айында бекітіліп, білім беру басқармаларына, білім бөлімдеріне таныстырылды.
Аталған концепцияда төмендегі шараларды өткізу үшін ұсыныстар:
- Ағымдағы жылдың 22 мамыр күні сағат 11.00-де «Балапан», «Ел арна» телеарналарынан 11 сыныптың оқушыларына кәсіптік бағдар беру бойынша бірыңғай телесабақ өткізіледі.
- Ағымдағы жылдың 25 мамыр күні сағат 11.00-де Білім және ғылым министрі Қ.Аймағамбетовтың, т.б. жергілікті мемлекеттік жерлердің басшыларының телевизиялық каналдарында құттықтау тілектері көрсетіледі. Сонымен қатар: «Сәт сапар, жас түлек!», «Ұстаздарға мың алғыс», «Көңілді жазғы демалыс» тақырыптарында үздік ұстаздар, оқушылардың жетістіктері, үздік білім проектісі туралы сюжеттік топтамалар көрсетіледі.
- Ағымдағы жылдың 25 мамыр күні уақыты белгіленген, жылжымалы, ыңғайлы кестеге сәйкес 1-10 сынып оқушыларына (ата-аналардың қатысуымен) онлайн режимінде онлайн-сынып сағаттар — соңғы қоңырау мерекесі өткізіледі. Онлайн сынып сағатына қамқоршылық кеңестің мүшелерін, танымал адамдар, жан-жақта білімділігімен көзге түскен, дарынды, бұрынғы бітіріп кеткен мектеп түлектері, бизнес өкілдері, мемлекеттік қызметкерлерді қатыстыру сұралады.
- Ағымдағы жылдың 3-4 маусым күндері 11 сынып оқушыларына салтанатты соңғы қоңырау мерекесі, аттестат тапсыру рәсімі өткізіледі. Мектеп ауласында, алаңында, ашық ауада өткізу, мектеп түлектерінің міндетті түрде мектеп формасымен келуі талап етіледі. 11 сынып оқушылары, мектеп түлектерінің ұйымдастыруымен «Туған елге тағзым», «Посади дерево», «Пайдалы іс — өзіңе ырыс» тақырыптарына қайырымдылық шараларға қатысады. Соңғы қоңырау мерекесінің өткізілу регламенті 40 минут. Карантинге байланысты, санэпиджағдайды ескере отырып, балалардың денсаулығын қорғау үшін мектеп басшысы салтанатты шараның өткізілу уақытын белгілеу, қысқартуға құқығы бар. Мерекелік шараға мектеп әкімшілігі, 11 сыныптың сынып жетекшісі, 1-2 ата-аналары тізім негізінде қатысады, ата-анасынан басқа туыстарының қатысуына шектеу қойылады. Басқа қонақтар, қатысушылар шақырылмайды. Салтанатты шараның құқық бұзушылықсыз, тәртіппен өткізілуіне мектеп басшысы жауапты. Маскалық режимді мідетті түрде сақтау және арақашықтық 1,5-2 метр болу қажет. Егер мектепте 11-сынып 1, 2 немесе 3 параллель сыныптар болса, онда 11 «А» сыныбы 10.00-10.40 аралығында, 20 минуттан кейін 11 «Ә» сыныбы 11.00.-11.40 аралығында 20 минут кейін, 11 «Б» сыныбы 12.00-12.40 аралығына сол сияқты ара қарай өткізіледі.
- Салтанатты мерекенің өткізілу алгоритмі: Мектеп алаңында арнайы белгіленген орындарына сапқа тұрғызу. Мектеп директорының құттықтау сөзі. Ата-ананың құттықтау сөзі. Сынып жетекшінің құттықтау сөзі. Мектеп түлегінің құттықтау сөзі. «Алтын белгі», «Үздік аттестат» иегерлерін құрметтеу, сый көрсету, салтанат көрсету. Аттестат тапсыру рәсімі.
- Мектеп басшылары ұжыммен бірлесіп педагогикалық этиканы және сыбайлас жемқорлықтың алдын алу мақсатында 11 сынып оқушыларынан, ата-аналарынан аттестат тапсыру рәсіміне қаражат жинауға тыйым салынады. Мектептің қамқоршылық кеңесі жоғарыда аталған жағдай бойынша, ақша жинамауға ата-аналарымен түсіндірме жұмыстарын жүргізу қажет. Мектеп директорына, мектепке, сынып жетекшіге бағалы сыйлықтар беру, тапсыруға қатаң түрде тыйым салынады.
- 11 сынып оқушыларына арналған «Соңғы қоңырау» мерекесін мектеп әкімшілігінің ұйымдастыруымен, сынып жетекшінің күшімен өткізілу тапсырылады. Ешқандай сырттан мереке өткізетін бөгде адамдар, аниматорлар, мерекелік ивент- агенттіктер, жеке студиялар шақырылмауы тиіс.
- 11 сынып оқушыларына арналған «Соңғы қоңырау» мерекесін аса салтанатты қылып өткізу міндетті емес, дәстүрлі түрде өткізу тапсырылады. Мектеп ғимаратында, мейрамханада, дәмханада, кафеде, үйде, т.б. тамақтану жерлерде дастархан жайып отырыс ұйымдастыруға қатаң тыйым салынады.
- 11 сынып оқушыларына арналған «Соңғы қоңырау» мерекесінде сыртқа көкке шығу, экскурсиялық жорыққа шығып демалу, қымбат автокөліктерді жалға алып, отырып қыдыруға тыйым салынады.
Салтанат ИМУХАНБЕТОВА,
аудандық білім
бөлімінің
сектор меңгерушісі.
Түлектердің 76% -ы ҰБТ-ға қатысуға ниет білдірді
Аудан бойынша барлығы 52 мектеп бар, оның 33 орта, 7 негізгі, 12 бастауыш мектебі білім беру үрдісімен айналысады. Биылғы оқу жылында 11 — сынып түлектері саны-459, ҰБТ-ға қатысатын оқушы саны-350, оның 335-і қазақ тілінде, 14 бала орыс тілінде, 1 оқушы ағылшын тілінде тапсыру жоспарлануда. Барлық 33 орта мектептен биылғы жылы 29 орта мектептің түлектері ҰБТ қатысады, аудан бойынша түлектердің қатысу пайызы 76, 3 мектеп қатыспайды, олар: Малайсары, Беріктас, Тастыөзек орта мектептері, себебі 11 сынып оқушылары жоқ және Ж. Тобаяқов атындағы орта мектептің түлектері ҰБТ-ға қатысуға өтініш білдірген жоқ. 2019-2020 оқу жылында «Алтын белгі» төс белгісіне 39, «Үздік аттестатқа» 20 үміткер бар.
ҰБТ-ға өтініш қабылдау мерзімі 2020 жылдың 15-сәуірінде басталып, 10- мамырда аяқталды. Өтініш электронды және қағаз түрінде қабылданды. Ұлттық бірыңғай тестілеу ағымдағы жылдың 20 маусым – 5 шілде аралығында өткізіледі.
Бүгінгі күнге ауданда ұлттық бірыңғай тестілеуді Сарыөзек орта мектебінің базасында өткізу жоспарлануда, дайындық жұмыстары жүргізілуде. Аудан түлектері үшін ҰБТ өткізілетін мерзімі анықталған жоқ, өйткені мерзімді арнайы ҚР Білім және ғылым министрлігінің Ұлттық тест орталығы бекітеді, бүгінгі күнге бекітілген жоқ.
Жоғары оқу орнына ақылы негізде түсу үшін алдыңғы жылы ҰБТ жылына 4 рет өткізілетін (қаңтар, наурыз, маусым және тамыз ). Алайда, биылғы жылы пандемияға байланысты наурыз айында өткізілетін ҰБТ өз мерзімінде өткізілмеді. Ұлттық тестілеу тест орталығының мәлімдеуінше, мамыр айының аяғында немесе маусым айының екінші онкүндігінде өткізілетін болады. Наурыз айындағы ақылы оқуға түсу үшін тестілеуден өтуге өтініш білдіріп отырған түлек саны-332, оның ішінде 32 түлек орыс тілінде. Бекітілген мерзімде жоғарыда аталған түлектер тест тапсыратын болады.
Жалпы, ҰБТ-ны тапсыру форматы өзгеріссіз. Бұл норма жоғары білім алуға қолжетімділікті арттыру мақсатында енгізілді. Өткен жылы ҰБТ-да 7 аудитория пайдаланылған, биылғы жылы карантинге байланысты бірнеше күн өткізілетіндіктен, аудитория саны көбейеді деген болжам бар. Барлық аудитория саны мамыр айының соңғы онкүндігінде анықталады. Биылғы жылдағы пандемияға, карантинге байланысты оқушылардың денсаулығы басты назарда тұр. Аталған өзгешіліктердің ішінде, 1 партада 1 оқушыдан отыру және оқушылар арасындағы ара-қашықтық 3 метр болу керектігі талап етіліп отыр.
Барлық аудиториялар ұялы байланыс құралдарының жұмысын басатын құралдар және бейнебақылау камераларымен қамтамасыз етіледі. ҰБТ кезінде ұялы телефон және тағы басқа заттарды пайдалануға рұқсат берілмейді. ҰБТ-ның алдында барлығы тексеріледі, тыйым салынған заттарын алып қойылады, акт толтырылып, тест тапсыру залынан шығарылып, жұмысы жойылады.
Білім бөлімі ҰБТ-ға дайындық бойынша іс-шаралар жоспарын дайындау үстінде. Жоспар, бұйрық, комиссия құрамы бекітіледі.
Г. САГАТОВА,
аудандық білім
бөлімінің бас маманы
АШЫҚ СҰХБАТ АЛАҢЫ
Мектеп оқушыларының қашықтықтан білім алып жүргендеріне алты аптаның көлемі болды. Осы уақыт ішінде онлайн сабақ беру жүйесі туралы түрлі пікірлер қалыптасты. Осындай қиын-қыстау уақытта, мамандықтардың төресі — ұстаздықтың орны ата-аналар мен оқушылар үшін де ерекше екені даусыз.
Осы орайда, Алматы облыстық білім басқармасының басшысы Омарова Майгүл Тілеутайқызы Кербұлақ, Іле, Балқаш аудандары және Қапшағай қаласының ұстаздар қауымымен онлайн кездесу өткізді. Онлайн кездесуге ауданымыздан 25 пән мұғалімі қатысты. Майгүл Тілеутайқызы өз сұхбатында алғашқы кезде қашықтықтықтан оқыту жағдайындағы білім беруде кедергілердің де болғанын, дегенмен, қазір мұғалімдер де, оқушылар мен олардың ата-аналары да бұл қиындықты еңсеріп, қашықтықтан оқыту қалыпты үрдіске айналғанын ерекше атап өтті. Сондай-ақ, сұхбат барысында білім платформаларын оңтайлы пайдалану, сапалы бейнесабақтар туралы өз тарапынан тиімді ұсыныстар да білдірді.
Сұхбатқа қатысушылар өздерін толғандырып жүрген мәселелер төңірегінде сұрақтар қойды. «БЖБ, ТЖБ жұмыстарындағы тыңдалым дағдысы қалай іске асырылады?», «БЖБ, ТЖБ жұмыстары қанша балл болуы керек?», «Қандай бөлімдерді қамту керек?», «11-сыныптағы бақылау диктанты қалай жүзеге асырылады?» деген сұрақтарға нақты жауап берілді.
Қазіргідей кезеңде облыс ұстаздарына үлкен сенім артатынын айта келіп, барша ұстаздарға сабыр мен төзім, еңбекте шығармашылық табыстар тіледі.
Дәл осы күні Алматы облыстық білім басқармасының басшысы Майгүл Тілетайқызы облыс көлемінде 5-7 сынып оқушылары арасында “Сабағың қалай, балақай?” тақырыбында ашық сұхбат алаңын өткізді. Ауданнан Қарашоқы орта мектебінің 6 сынып оқушысы Мәдина Қыдырқожа, №49 орта мектебінің 7 сынып оқушысы Нұрай Өмірбек қатысты. Оқушылар қашықтықтан білім алудағы жетістіктерін және тиімді-тиімсіз жақтарын айтып, өз ойларымен бөлісті. Оқушылардың басым көпшілігі ұстаздарын, мектебін, мектептегі достарын сағынғандарын айтып, сағынышты өлең жолдарын арнады. Ашық сұхбат кезінде оқушылар бос уақыттарында салған суреттерін және қолөнер бұйымдарын, сонымен қатар, өздерінің жетістіктерін көрсетіп, бос уақыттарында тіл үйреніп жатқандарын да айтып өтті.
Сонымен қатар, 13 мамыр күні «Білімге ұмтыл, жас дос» тақырыбындағы ашық сұхбат алаңын орта буын оқушыларымен өткізді. Ашық алаңға Д.Қонаев атындағы орта мектебінің 9 сынып оқушысы Аяулым Нұрахан, Күреңбел қазақ орта мектебінің 8 сынып оқушысы Аружан Ерғали қатысты. Облыстың бас ұстазымен қатысушы оқушылар ерікті түрде диалог құра білді.
Облыстық білім басқармасының басшысы Майгүл Тілеутайқызы оқушылармен кездесу барысында өз ойларын еркін жеткізе білген, дарынды, талантты оқушыларға алғысын білдірді.
Г. ЖУНИСПАЕВА,
аудандық білім беру
оқу- әдістемелік
орталығының аға әдіскері.
Қашықтан оқыту
Оқыту процесінде қолданылатын жаңа әдістердің бірі қашықтан оқыту әдісі болып табылады. Қашықтан оқыту – ақпараттық құралдар және ғылыми негізделген тәсілдер арқылы білім алу формасы. Елімізде ақпараттық технологияларды және компьютерлік желі арқылы жаңа білім әдістерін пайдалану кеңейтіліп келеді. ХХІ ғасырда ақпараттық жүйелердің өркендеп, дамып келе жатқанын білеміз. Негізгі базалық білім беруде қызмет көрсету жағынан да қашықтан оқыту мүмкіндіктері үкімет тарапынан қолдау тауып жатыр. Осы технологияны пайдалану — ауылдық жерлерді де жылдам ақпараттандыруға көмектесуде.
Білімнің қайнар көзі оқулықта, мектепте. Қашықтан оқыту әдісі білім беру саласына біраз мүмкіндіктер сыйлады.Оқушылардың мұғалім көмегінсіз, өз бетінше жұмыс істеуі, баланың ізденімпаздығын дамытады.Қашықтан оқу арқылы өз білімдерін жетілдіре алады және ақпарат жүйелерін пайдалану мүмкіндігі артады. Мысалы керекті әдебиеттер мен оқу кітаптарын іздеу, бақылау және тестік тапсырмаларды орындау, қашықтан олимпиадаға қатысу оқушының шығармашылық потенциалының дамуына әсер етеді. Оқушылар мұғалім мен ата-ананың қолдауы арқылы қашықтан оқудың маңыздылығын түсінуде.
Осыған орай, №49 орта мектеп ұстаздары, оқушылары түрлі ғылыми жарыстарға, олимпиадаларға қатысып, жүлделі орындар алуда. Айтулы мерекелерге орай, әлеуметтік желілер арқылы видеожазбалар түсіріп, шығармашылық белсенділіктерін дамытуда. Атап айтар болсақ, »Біз біргеміз, біз үйдеміз», »Ұлы жеңістің 75 жылдығы» және т.б. әлеуметтік желі арқылы түрлі челлендждерге атсалысып, қашықтан оқытудың тиімді тұстарын үйренуде.
Нәзира КУНАНБАЕВА,
№49 орта мектептің
бастауыш сынып мұғалімі.
